WALANG kapangyarihan ang Impeachment court na idismiss ang impeachment case ni Vice President Sara Duterte na walang isinasagawang paglilitis.

Reaksyon ito ni Manila Rep. Joel Chua, isa sa 11 miyembro ng House prosecution panel dahil labag umano sa Saligang Batas.

“Not within the power of impeachment court,” ani Chua.

Una rito, sinabi ni Senate President Francis “Chiz” Escudero na lahat ng posibilidad ay puwedeng mangyari tulad ng pag-dismiss sa kaso ni Duterte kahit hindi ito dumaan sa paglilitis.

Maaari umano itong magawa kapag may isang Senator-Judge ang nagmosyon na idismiss ang kaso ni Duterte base sa kanyang “answer ad cautelam” at paglalarawan sa kaso bilang basura dahil wala umano itong basehan.

Ayon sa mambabatas, malinaw sa Saligang Batas na kailangang litisin muna ng Impeachment Court at matapos ito ay saka magbobotohan ang mga Senator-Judge kung guilty o hindi ang inimpeach na opisyal.

Maging si Mamamayang Liberal (ML) party-list Representative-Elect Leila de Lima ay hindi naitago ang pagkadismaya kay Escudero dahil nagkaroon umano ng sariling bersyon ang senador sa 1987 Constitution.

“May Chiz Escudero version na talaga ang 1987 Constitution. Ibang-iba sa original,” ani De Lima.

Gayunpaman, tulad ni Chua, sinabi ni De Lima na kailangang sundin ng Senator-Judges ang Saligang Batas at litisin muna si Duterte bago magbotohan ang mga ito imbes na idiretso ito sa pagdismis.

(BERNARD TAGUINOD)